Erlinda Haska, mes shumë vështirësive po e rrit tre vajzat e mitura.
Ajo i dha fund martesës për shkak të dhunës në familje, ndërsa ish-bashkëshorti është dënuar. Erlinda theu heshtjen disa vjeçare dhe vendosi të shprehë kalvarin e mundimshëm të vuajtjeve.
“Ai mbante armë, më ka kërënuar dhe më ka qëlluar por shpëtova nga plumbi i tij. Vajzat rrinin me javë të tëra pa ngrënë kur ishim në Libohovë. Ishte shumë i dhunshëm, pinte alkool dhe lunate bixhoz. Kam 7 vite që kam ardhur tek prindërit”, tha ajo.
Erlinda është kthyer në shtëpinë e prindërve, në Dragot të Tepelenës pas trajtim çnjerëzor të ish-bashkëshortit. Sot jeton në kushte të vështira ekonomike me vëllezërit dhe nënën e sëmurë.
“Veç një Zot e di se si jetojmë këtu, mund të na zërë tavani. Jetojmë me borxhe në dyqane. Vajzat më shumë pa bukë se me bukë”, thekson ajo.
Trajtimi financiar prej 12 mijë lekësh që merr nëna e Erlindës nuk mjafton as për barna. Ndërsa banesa i ngjan një ngrehinë që rrezikon t’i zërë brenda. Erlinda Haska ka nevojë për punë dhe mbështetje sociale pasi gjendet në vështirësi për të rritur 3 vajzat minorene.
“Kërkoj strehim dhe punë sepse unë u jam bërë barrë prindërve që janë të varfër”, tha për Report TV.
Administratori i Njësisë Qendër-Tepelenë premton ndihmë ekonomike për gruan e dhunuar por apeli për ndihmë i drejtohet dhe organizatave për gratë e dhunuara. Dhuna në familje është një fenomen shqetësues në gjithë qarkun e Gjirokastrës.
Viti 2024 u mbyll me 59 kërkesa për urdhër mbrojtje, bën të ditur gjykata, ndërsa në tre muajt e parë të këtij viti (Janar-Mars 2025) janë depozituar 8 kërkesa për urdhër mbrojtje nga gratë.