Detaje të reja dalin lidhur me shpërthimin e bombolës së gazit brenda një banese ditën e sotme në Maliq.
Nga shpërthim i banesës mbetën të lënduar 3 pjesëtarët e familjes që ndodheshin në shtëpi në momentin e shpërthimit.
Shpërthimi i bombolës shkaktoi dëme të konsiderushme në banesë.
Një nga pjesëtarët e familjes në Maliq foli për mediat, ku tregoi se si ndodhi shpërthimi.
“Morëm bombolën, vetë shpërtheu flama, po e ndërronte nusja, u hap edhe iku. Unë nuk mbaj mënd hiç se u mbush me tym, po kërkoja djalin e madh. I kam në spital, nuk e di si janë. Dëme në shtëpi ka, aman vetëm të mi bëjnë, se bashkia mi ka bërë këto shtëpi, sa ka që mi bëri, dua ndihmë, çfarë të bëj unë, ku t’i gjej, bashkia mi bëri, ja pyesni. Çfarë të bëj ku të shkoj unë, unë burrin e sëmurë, vetë e sëmurë pa pensione pa gjë prej gjëje. Nusja punon në shtëpinë tonë, ka një vit që ka filluar punë, të tërë pa punë jemi. Brenda në shtëpi ishim 3, nusja, unë dhe djali. Djali më mbeti brënda, nuk hapja dot derën, pastaj hapa derën që doli djali”, tha gruaja.
Njoftimi i policisë
Maliq/Informacion paraprak
Rreth orës 11:00, në Fshat Maliq, në banesën e shtetasit M. M., dyshohet se ka shpërthyer një bombël gazi.
Si pasojë e shpërthimit janë dëmtuar 3 shtetas, pjesëtarë të familjes, të cilët aktualisht po marrin mjekim në spitalin e Korçës dhe ndodhen jashtë rrezikut për jetën.
Grupi hetimor ndodhet në vendngjarje dhe po punon për sqarimin e plotë të rrethanave të rastit.