Reperi Asdren Gjikolli – i njohur për publikun me emrin artistik Gjiko
– është shpallur i pafajshëm nga Gjykata Themelore e Prishtinës në lidhje me akuzën për abuzim, që ka qenë në qendër të vëmendjes mediatike disa vite më parë.
Vendimi u mor pas një procesi gjyqësor që përfshiu shqyrtimin e provave të paraqitura nga prokuroria dhe mbrojtja. Sipas burimeve të sigurta të Telegrafit, trupi gjykues ka arritur në përfundimin se provat ishin të pamjaftueshme për të lidhur artistin me akuzën e ngritur ndaj tij, duke çuar në lirimin e tij nga të gjitha pikat e aktakuzës.
Në mars të vitit 2022, disa media raportuan se ndaj Gjikos ishte ngritur një aktakuzë e rëndë për abuzim ndaj një të miture 15-vjeçare. Sipas padisë së pretenduar në atë kohë, reperi dyshohej se kishte mashtruar vajzën me premtime për karrierë muzikore, e më pas kishte përdorur substanca narkotike dhe kishte kryer marrëdhënie seksuale me të.
Lajmi u përhap me shpejtësi në rrjete sociale dhe media, duke shkaktuar reagime të forta në publik dhe duke vënë nën presion figurën publike të reperit. Megjithatë, menjëherë pas publikimit të pretendimeve, Gjiko i mohoi kategorikisht të gjitha akuzat.
Në një deklaratë të publikuar në rrjete sociale në atë kohë, ai shkroi:
“Të nderuar familjarë dhe miq,
Gjatë këtyre ditëve, unë dhe familja ime jemi duke u përballur me një të pavërtetë të sajuar. Unë nuk kam dhunuar askënd, e lëre me një 15-vjeçare. Nuk kam mashtruar dhe as nuk kam premtuar karrierë, e as nuk i kam dhënë një të miture substanca narkotike. Familja ime është shumë në rregull sepse e dinë që kjo gjë është e sajuar.”
Ai gjithashtu bëri të ditur se kishte ndërmarrë hapa ligjorë kundër shpifjeve, duke theksuar se besonte në drejtësinë e institucioneve.