Ikler Sula, 26 vjeç plagosi me thikë një ditë më parë nënën e tij 50-vjeçare, Nexhmije Sulën. Ngjarja e rëndë u regjistrua në banesën e tyre në fshatin Çerënë, rreth 1 kilometër larg Maqellarës.
I riu, në gjendje të rënduar psikologjike goditi shtatë herë me thikë të ëmën e cila aktualisht është duke luftuar me vdekjen në Spitalin e Traumës në Tiranë.
Burime nga spitali konfirmojnë se 50-vjeçarja, e cila mbante postin e drejtoreshës së shkollës 9-vjeçare në Pocest, vijon të jetë në gjendje të rëndë për jetën si pasojë e plagëve të marra.
Siç dhe raportuam më herët, 26-vjeçari prej tre vitesh vuante nga probleme të shëndetit mendor, mirëpo familjarët së fundmi kishin menduar se ai ishte rikuperuar.
Policia ka shoqëruar në Komisariat të riun, ndërkohë që është duke punuar për zbardhjen e plotë të kësaj ngjarje dhe shkakun i cili çoi Iklerin të kryente këtë akt të rëndë.
Kujtojmë se Nexhmije Sula është nënë e tre fëmijëve, dy djemve dhe një vajzë, ndërkohë që ishte djali i saj i vogël, ai i cili e plagosi.
“Plagosi me mjet prerës (thikë), nënën e tij, gjatë një konflikti për motive të dobëta, kapet menjëherë nga shërbimet e Policisë dhe vihet në pranga autori i dyshuar.
Shërbimet e Policisë, menjëherë pas marrjes së njoftimit, se në fshatin Pocest, Maqellarë, kishte ndodhur një konflikt në familje, menjeherë kanë shkuar në adresën e marrë. Nga veprimet hetimore të kryera ka rezultuar se, gjatë një konflikti për motive të dobëta, shtetasi I.S., 26 vjeç, ka plagosur me mjet prerës (thikë), nënën e tij shtetasen N.S., 50 vjeçe, e cila ndodhet në spitalin e Traumës, në kujdesin e mjekëve.
Mjeti prerës (thikë), është sekuestruar në cilësinë e provës materiale. Materialet procedurale iu referuan Prokurorisë Dibër, për veprime të mëtejshme”, njoftoi Policia ditën e djeshme.