Një foshnjë 10 muajshe ka ndërruar jetë në spitalin rajonal të Vlorës, ndërsa familjarët pretendojnë se humbja e jetës ka ardhur për shkak të mungesës së reagimit të shpejtë nga ana e stafit mjekësor.
Nëna e fëmijës kishte kërkuar ndihmë mjekësore në orët e para të mëngjesit, duke denoncuar më pas se për më shumë se një orë nuk kishte marrë asnjë shërbim.
Sipas saj, mjeku i turnit ishte larguar duke thënë se ishte i lodhur pas turnit të natës, ndërsa infermieret e kishin udhëzuar të priste deri në orën 07:00 kur do të ndërrohej stafi.
Foshnja ndodhej me temperaturë të lartë dhe, sipas familjarëve, ishte vendosur në një ambient të papërshtatshëm, jo në një dhomë të rregullt spitalore, ndonëse sipas tyre kishte dhoma të lira.
Për këtë rast është kërkuar hetim i plotë dhe transparent nga institucionet shëndetësore dhe ato të drejtësisë, për të përcaktuar nëse ka pasur shkelje apo neglizhencë në trajtimin e urgjencës pediatrike.
Deri tani nuk ka reagim zyrtar nga Drejtoria e Spitalit të Vlorës apo nga Ministria e Shëndetësisë.