Debati publik mes aktores së njohur Delinda Disha dhe regjisorit Altin Basha tashmë ka marrë një tjetër rrjedhë,
pasi Newsbomb ka siguruar mesazhet mes tyre që datojnë më 31 gusht 2019. Vetë, Delinda përmes një videoje të shpërndarë në rrjetet sociale pretendon se ajo ishte larguar padrejtësisht nga puna nga regjisori Altin Basha.
Megjithatë, mesazhet e publikuara tregojnë një tjetër anë të historisë. Në bisedën e tyre private të siguruar nga Newsbomb, kuptohet qartë se aktorja i ka komunikuar vetë regjisorit vendimin e saj për t’u larguar nga puna, duke theksuar se i ishin ofruar mundësi të tjera pune.
Në një pjesë të mesazhit të saj, Delinda shkruan:
“Profesor! Arsyeja pse nuk mundem të vazhdoj më në atë ambient pune është se mendoj që çfarë kisha për të dhënë, e kam dhënë. Normalisht, më kanë ofruar edhe një punë tjetër me të cilën kam rënë dakord. Gjithashtu, unë kisha disa qëllime të mia, si moderimi, që nuk u realizuan, dhe duke pasur parasysh shumë rrethana të tjera personale, mendoj se është më mirë kështu. Ju jam mirënjohëse për gjithçka dhe ju uroj gjithë të mirat.”
Altin Basha, nga ana tjetër, i kishte dhënë këshilla që të rimendonte edhe një herë vendimin e marrë.
“Me përjashtim të moderimit dhe pagës, ti nuk ke pasur pretendime të tjera. Pagën e ndryshuam. Moderimin ta refuzova. Unë nuk njoh asnjë ambient televiziv ku punohet qetësisht. E tillë është natyra e televizionit. Gjithsesi, këshilla ime është që ta mendosh mirë përpara se të vendosësh përfundimisht. Mendoj se askund tjetër dhe me askënd tjetër nuk mund të rritesh profesionalisht ashtu siç je rritur me mua në TCH,” shkruante në mesazhin e tij regjisori.
Debati mes tyre vjen në një kohë kur emri i regjisorit është përfshirë në një investigim të emisionit “Piranjat”, që e akuzon për konflikt interesi në drejtimin e teatrit. Sipas raportimeve, ai ka punësuar bashkëshorten e tij, Iliriana Basha, dhe ka menaxhuar fondet e teatrit në mënyrë të dyshimtë, përfshirë një blerje të një pardesyje me një diferencë të madhe çmimi.
Nga ana tjetër Delinda, në një postim të saj në Instagram, ka kërkuar që teatri të “lirohet nga interesat personale” dhe ka theksuar se “teatri i përket vetëm artistëve.”
