Një tjetër rast tragjik është regjistruar në Fier, ku një tjetër person i ka dhënë fund jetës duke u vetëvarur.
Referuar njoftimit të Policisë së Shtetit, një 28-vjeçar me iniciale N. Ll., është vetëvarur në oborrin e banesës së tij në fshatin Cakran të Fierit. I riu është gjetur pa shenja jete nga familjarët ndërsa të paqarta janë rrethanat që e kanë shtyrë 28-vjeçarin të ndërmarrë një hap të tillë.
“Fier/Informacion paraprak
Rreth orës 14:00, në fshatin Cakran, është gjetur nga familjarët, pa shenja jete, në oborrin e banesës së tij, shtetasi N. Ll., 28 vjeç, i cili dyshohet se është vetëvarur.”
Ky është rasti i dytë i raportuar brenda dy ditëve në Fier, teksa ditën e djeshme në fshatin Levan, një 65-vjeçar është vetëhedhur nga kati i dytë i banesës së tij duke gjetur vdekjen. Rastet e vetëvrasjes janë rritur në masë ditët e fundit, ngjarje këto që kanë dhënë alarmin tek qytetarët mbi mirëqenien e shëndetit mendor po ashtu dhe tek autoritetet me qëllim marrjen e masave parandaluese për të tilla ndodhi tragjike.
Ajo çfarë ka shkaktuar më tepër reagime, është fakti se këto veprime ekstreme dominohen nga moshat e reja apo adoleshentë.