Fundjava pritet të sjellë ndryshim të ndjeshëm të motit në vend, pas muajsh të nxehtë me temperatura mbi normën.
Shërbimi Meteorologjik Ushtarak njofton se gjatë ditës së sotme dhe të shtunën do të ketë reshje shiu të shoqëruara me shtrëngata pothuajse në të gjitha qarqet.
Reshje intensive parashikohen në Lezhë dhe Durrës, ndërsa në Shkodër, Dibër, Tiranë, Vlorë dhe Gjirokastër do të ketë reshje mesatare deri lokalisht të forta.
Qarku Kukës do të ketë reshje mesatare, ndërsa në pjesën tjetër të vendit priten reshje më të lehta. Era do të fryjë e lehtë deri mesatare, me shpërthime të forta në bregdet dhe zonat malore. Temperaturat do të luhaten nga 14 °C në zonat malore deri në 28 °C, ndërsa në bregdet do të variojnë nga 21 °C deri në 24 °C.
Për shkak të kushteve të vështira atmosferike, Kapitaneria e Vlorës ka ndaluar pajisjen me leje-nisje të mjeteve të vogla lundruese dhe ato të peshkimit që operojnë jashtë gjirit. Ndalimi hyn në fuqi sot, më 30 gusht, që nga ora 10:00, me qëllim shmangien e rrezikut në det të hapur.
Ky paralajmërim vjen në një moment kur pushuesit ndodhen ende në brigjet shqiptare, ndërsa autoritetet apelojnë për kujdes dhe respektim të masave të sigurisë.