Pasagjeri 16 vjeçar që ndodhej në motor me Luan Llanaj dhe që u aksidentuan sot në qytetin e Vlorës, ka ndërruar jetë në spital.
Drejtuesi 19 vjeçar i motorit, Luani, humbi jetën në vendngjarje si pasojë e përplasjes së fortë, ndërsa këtë pasdite konfirmohet dhe vdekja e pasagjerit.
“Në vijim të aksidentit të ndodhur sot, në rrugën “Demokracia”, ju informojmë se shtetasi Luan Llanaj, 19 vjeç, i cili ndërroi jetë në vendngjarje, ka qenë drejtuesi i motomjetit.
Gjithashtu, ka ndërruar jetë gjatë transportit për në Spitalin e Traumës edhe shtetasi i mitur T. M., 16 vjeç, i cili udhëtonte si pasagjer”, thuhet në njoftimin e Policisë së Vlorës, e cila në përfundim të veprimeve hetimore, do t’i referojë materialet në Prokurori.
Aksidenti ka ndodhur në vendin e njohur si “Pusi i Mezinit”, rreth orës 13:35 të kësaj të diele, kur Luan Llanaj, 19 vjeç, udhëtonte me motor me të miturin T.M, 16 vjeç, si pasagjer dhe u përplasën me një shtyllë elektrike jashtë rrugës. Më pas, motori u përplas dhe me një shtyllë tjetër druri.
Dy të rinjtë morën plagë të shumta nga përplasja e fortë me motor dhe Luan Llanaj ndërroi jetë në vendngjarje, ndërsa i mituri u dërgua me urgjencë në spital. Fatkeqësisht, pavarësisht ndihmës së mjekëve të Spitalit të Traumës, ai ka ndërruar jetë rreth orës 19:30.