Këmbët përballen çdo ditë me rrugët e gjata dhe me këpucët e parehatshme që mund të shkaktojnë probleme dhe të ndikojnë në shëndetin tonë.
Sidomos tani në dimër për arsye të këpucëve të mbyllura shumë njerëz hasin në një problem që në fakt është tepër i zakonshëm, futja e thoit në mish.
Gjendja ndodh shpesh kur njerëzit presin thonjtë duke rrumbullakosur cepin e tyre, pasi nëse thonjtë e këmbës lakohen me formën e gishtit, ata mund të kenë tendencën të rriten nën lëkurë.
Zakonisht preket më shumë gishti i madh i këmbës. Një thua i rritur në mish, mund të shkaktojë dhimbje, lëkurë të përflakur, enjtje dhe ndonjëherë, infeksion rreth thoit të këmbës.
Nëse keni diabet ose një gjendje tjetër që shkakton rrjedhje të dobët të gjakut në këmbët tuaja, jeni në rrezik më të madh të komplikimeve të thonjve të futur në këmbë.
Në studion e “Rreze Dielli” në Report TV specialisti i bimëve mjekësore Ylli Merja tregon sesi të kujdesemi vetë në kushte shtëpie për thonjtë e futur në mish, si ti trajtojmë ato në mënyrë natyrale për të shmangur çdo komplikim të mundshëm.
“Ka shumë faktorë që thonjtë të rriten nën lëkurë. Përveç këpucëve të ngushta që sjellin mos oksigjenim të këmbëve dhe prerjes së gabuar të thonjve deri në mish dhe të rrumbullakosur, faktorë tjetër është dhe higjena e dobët apo shëndeti dhe cilësia e thoit, e trashë ose e hollë” thekson Merja.
Sa të shikojmë që ndjejmë një problem me futjen e thoit në mish dhe sapo ka filluar një skuqje e lehtë, është mirë që të fillojmë menjëherë të ndërhyjmë, pa e lënë gjatë dhe për të parandaluar komplikimet dhe infeksionin.
“Marrim 5-6 litra ujë të nxehtë, hedhim në të 1 lugë gjelle kripë të zezë dhe 1 lugë gjelle sodë buke. Futim këmbët në ujin e nxehtë në mënyrë që thoi të zbutet dhe të marrë lagështirë si dhe të fitojë elasticitet. Marrim gishtin ku kemi problematikën dhe e shtypim me duar duke e mbajtur drejt. Këtë veprim duhet ta bëjmë për 1 javë rresht në mënyrë që të bëjmë një zbutje dhe një drejtim të thoit që rritja të bëhet jashtë mishit. Pjesën problematike të thoit e presim me prerëse ose me një pincë të vogël. Pasi e kemi bërë këtë proces, çdo mbrëmje bëjmë një lyerje të thoit me 5-6 pika propolis, e lëmë derisa propolisi të përthahet dhe hedhim përsëri 5-6 pika të tjera. Vendosim më pas një krem në mënyrë që thoi të rrijë sa më i zbutur” këshillon specialisti i mjekësisë alternative Ylli Merja.
Në rast se thoi është bërë më i trashë se 1 milimetër, shprehet Merja, gjatë ditës vendosim vaj rigoni në thonjtë e këmbës, pasi vaji i rigonit dobëson strukturën e fortësuar të thoit si dhe vret bakteret dhe infeksionet. Por ka dhe njerëz që i kanë thonjtë të butë, në këtë rast nuk përdorim vajin e rigonit, por vaj mente ose miell tërshëre të lagur me pak qumësht. E lemë 10-15 minuta.
Po në rastet kur kemi një inflamim të thoit, kur kemi qeska me qelb si duhet vepruar?
Në këto raste pasi i kemi mbajtur këmbët në ujë të nxehtë me kripë dhe sodë buke, vendosim në vendin e inflamur një thelpi hudhër të shtypur, e lëmë që hudhra të veprojë si një antibiotik duke e përtharë infeksionin. Më pas e lyejmë me propolis me rigon, e lëmë të thahet dhe vendosim një krem zbutës. Për të bërë një pastrim të infeksionit dhe për të parandaluar probemet mykotike bëjmë dhe shpëlarje me çaj antimykotik si dhe konsumojmë duke e pirë me pak mjaltë dhe 1-2 gota në ditë, këshillon specialisti Ylli Merja.
MC/Shqiptarja.com