Policia e Vlorës ka reaguar lidhur me aksidentin e regjistruar këtë të diel në qytetin e Vlorës.
Përmes një njoftimi zyrtar blutë e qytetit bregdetar bëjnë me dije se rreth orës 13:40, në rrugën “Demokracia”, pranë vendit të quajtur “Pusi i Mezinit”, dy shtetas duke udhëtuar me motomjetin tip “Piagio” me targa AK653, janë përplasur me shtyllën elektrike dhe një tjetër shtyllë druri.
Si pasojë ka ndërruar jetë në vendin e ngjarjes i riu 19-vjeçari Luan Llanaj, ndërkohë që i plagosur ka mbetur i riu me ininciale T.M.
Ky i fundit është dërguar menjëherë në spital ku dhe po lufton për jetën, ndërkohë që grupi hetimor ndodhet në vendin e ngjarjes dhe po punon për zbardhjen e plotë të rrethanave të aksidentit si dhe për përcaktimin e shtetasit që ishte në drejtim të motomjetit.
“Sot, rreth orës 13:40, në rrugën “Demokracia”, pranë vendit të quajtur “Pusi i Mezinit”, dy shtetas, duke udhëtuar me një motomjet, dyshohet se kanë humbur kontrollin mbi drejtimin e tij dhe si pasojë motomjeti ka dalë nga rruga dhe është përplasur me një shtyllë elektrike.
Si pasojë e aksidentit, ka ndërruar jetë shtetasi L. Ll., 19 vjeç, ndërkohë që shtetasi T. M. është dërguar në spital për ndihmë mjekësore.
Grupi hetimor ndodhet në vendngjarje dhe po punon për sqarimin e rrethanave të aksidentit, si dhe për përcaktimin e shtetasit që ishte në drejtim të motomjetit”, njofton Policia.